பருவத்தால் அன்றிப் பழா !

அடுத்து முயன்றாலும் ஆகும்நாள் அன்றி

எடுத்த கருமங்கள் ஆகா - தொடுத்த

உருவத்தால் நீண்ட உயர்மரங்கள் எல்லாம்

பருவத்தால் அன்றிப் பழா.

- ஒளவையார் (மூதுரை)

பொருள்:
உருவத்தால் விரிந்து,நீண்ட உயரமான மரங்கள் யாவும், பழுக்க வேண்டிய காலத்தில் அல்லாமல் பிறகாலத்தில் பழுக்காது. அதுபோல விடாமல் முயற்சி செய்தாலும், கூடிவர வேண்டிய காலம் வந்தால் அன்றி, தொடங்கிய காரியங்கள் வெற்றி பெறாது.

அடுத்து-விடாது தொடர்ந்து, கருமங்கள்- காரியங்கள், தொடுத்த-விரிந்த, பருவத்தால்- பழுக்க வேண்டிய காலத்தில், பழா-பழுக்காது.

நீதி:
ஒரு செயலைத் தொடங்கும்முன் அதற்கு ஏற்ற காலம் அறிந்து தொடங்க வேண்டும்.

இன்பத் தமிழ்

தமிழுக்கும் அமுதென்று பேர்! - அந்தத்
தமிழ் இன்பத் தமிழ்எங்கள் உயிருக்கு நேர்!

தமிழுக்கு நிலவென்று பேர்! - இன்பத்
தமிழ் எங்கள் சமுகத்தின் விளைவுக்கு நீர்!

தமிழுக்கு மணமென்று பேர்! - இன்பத்
தமிழ் எங்கள் வாழ்வுக்கு நிருமித்த ஊர்!

தமிழுக்கு மதுவென்று பேர்! - இன்பத்
தமிழ் எங்கள் உரிமைச்செம் பயிருக்கு வேர்!


தமிழ் எங்கள் இளமைக்குப் பால்! - இன்பத்
தமிழ் நல்ல புகழ்மிக்க புலவர்க்கு வேல்!

தமிழ் எங்கள் உயர்வுக்கு வான்! - இன்பத்
தமிழ் எங்கள் அசதிக்குச் சுடர்தந்த தேன்!

தமிழ் எங்கள் அறிவுக்குத் தோள்! - இன்பத்
தமிழ் எங்கள் கவிதைக்கு வயிரத்தின் வாள்!

தமிழ் எங்கள் பிறவிக்குத் தாய்! - இன்பத்
தமிழ் எங்கள் வளமிக்க உளமுற்ற தீ!

- பாவேந்தர் பாரதிதாசன்

அல்லா என்பார் சிலபேர்கள்...

அல்லா வென்பார் சிலபேர்கள் ;

       அரன்அரி யென்பார் சிலபேர்கள் ;

வல்லான் அவன்பர மண்டலத்தில்

       வாழும் தந்தை யென்பார்கள் ;

சொல்லால் விளங்கா ' நிர்வாணம்'

       என்றும் சிலபேர் சொல்வார்கள் ;

எல்லா மிப்படிப் பலபேசும்

       ஏதோ ஒருபொருள் இருக்கிறதே !


அந்தப் பொருளை நாம்நினைத்தே

       அனைவரும் அன்பாய்க் குலவிடுவோம்.

எந்தப் படியாய் எவர்அதனை

       எப்படித் தொழுதால் நமக்கென்ன ?

நிந்தை பிறரைப் பேசாமல்

       நினைவிலும் கெடுதல் செய்யாமல்

வந்திப் போம்அதை வணங்கிடுவோம் ;

       வாழ்வோம் சுகமாய் வாழ்ந்திடுவோம்.

-நாமக்கல் கவிஞர் இராமலிங்கம் பிள்ளை


மத நல்லிணக்கத்தை வலியுறுத்தும் அருமையான பாடல் இது. இதைவிட எளிமையாக, குழந்தைக்கும் புரியும் வகையில் மத நல்லிணக்கத்தை எடுத்துச் சொல்ல முடியுமா என்பது சந்தேகம்தான்.

//எந்தப் படியாய் எவர்அதனை
எப்படித் தொழுதால் நமக்கென்ன ?//

"நச்"சென்று ஒரு கேள்விகேட்டு, மதசகிப்புத்தன்மையை வலியுறுத்துகிறார்.அது மட்டும் இருந்துவிட்டால் தான், இன்றைய இன்னல்களுக்கு இடமே இல்லையே.

//நிந்தை பிறரைப் பேசாமல்
நினைவிலும் கெடுதல் செய்யாமல்//

என்று இரண்டே அடிகளில், அனைத்து மதங்களும் வலியுறுத்தும் அறநெறியை, சுருக்கமாகச் சொல்லிவிடுகிறார்.

"சூரியன் வருவது யாராலே?" என்ற பாடலின் ஒரு பகுதியாக வரும் இவ்வரிகளை, இறை வணக்கப் பாடலாகவும், சர்வமத வழிபாட்டுப் பாடலாகவும் பயன்படுத்தலாம். குழந்தைகளுக்குச் சொல்லிக் கொடுக்கலாம்.